يالشباب اللي حضرتم أسمعوني
اسمعو ماأقول بصدورن رحايب
الولد يصير في ممشاه واضح
يتجنب درب المهازل والمعايب
أبتعد عن مايضرك في حياتك
والتهاون حط له قبر ونصايب
وأتكل بالله أواصل في مسيرك
وعوذ الشيطان ملعون الصلايب
وأتجه للمعرفة لاتكون جاهل
وأنت تدري بالجهل رأس السبايب
والجهل هدم أبيوت(ن)  شامخاتي
مايجيب ألا المشاكل والمصايب
وفي دورة المرجله كرس أجهودك
مايحفظ المرجله من كان سايب
ومن تخطرته المراجل في شبابه
مستحيل أيحوشها لاصار شايب
والمراجل دربها ماهو أبهين
مايخوض غمارها من كان هايب
القريفه كد ذكرها في ألحونه
أستمع له بيت في معناه صايب
(المراجل ماتهيا هالسويا )
يامكثرت الشتايم والطلايب
كود من عض النواجذ في سنونه
دونها يوجد تكاليف وتعايب
ومثل قول أغنيم إبن بطاح شاهد
العبيوي محتمي تال الركايب
الولد لاصار به خوفاً وذله
عقبه للي يخضن الغبايب
كان ماتشتب ناره من زنوده
خايب وأبوه مماجاب خايب
والطيور أبها تخالف عن بعضها
في طبايعها تشوفون العجايب
الطيور أبها حرار صيرميه
ماتوقع غير في عالية الرقايب
وبه طيور (ن )شكلها من نوع ثاني
عشها موجود بركون الخرايب
هكذا ضرب المثل ياهل المثايل
من تجارب متعبة عوص النجايب
وأختتام القيل ونهاية كلامي
أعرف أن الدين والدنيا وهايب
وياصلاة الله على الهادي محمد
عد ماهبت ذعاذيع الهبايب